«Шымкент – ТМД елдерінің мәдени астанасы»

«Шымкент – ТМД елдерінің мәдени астанасы» шарасы аясында шырайлы шахардың тарихы мен мәдениетіне қызығушылар саны күн сайын артып келеді. Солардың қатарында сонау мұхит асып келген мәртебелі қонақтар — Аризона мемлекеттік университетінен, Шығыс Еуропадағы және Орта Азиядағы Cintana Education білім беру орталығының жетекшісі Кагри Бахчоглу, осы университеттің кеңесшісі Нью Ли Холман және Маркетинг және серіктестік бойынша аналитик Евгения Орловалар Әдет-ғұрып және салт-дәстүр орталығында болды.
Мұндағы жеті санының қасиетіне арналған жәдігерлер, әлемнің кіші моделі-киіз үйдің құрылысы, Ішкі жасау жабдықтары, қазақ тіршілігіндегі қолданылатын тұрмыстық бұйымдар, Қыз жасауы, Үйдің төрі мен босағасы, Отбасының әлеуметтік орны жайында кеңінен мағлұмат берілді.
Қашанғы қазақы меймандостық ілтипатпен күздің бал қымызы мен сары бауырсағынан дәм татқан қонақтар ерекше ықыласымызға тәнті болды

“Ғибратты ғұрыптар” Бесікке салу дәстүрі

“Ғибратты ғұрыптар” айдарының алғашқы бастамасы көрермендерге жол тартпақ.
Қазақ қоғамында сонау ықылым замандарда бесікке бөлеу және бесік жырын айту сынды дәстүрлердің болғанына дәлелдер көп. Еңлік-Кебек жырында бесік құда туралы, Қобыланды жырында «Алтыннан бесік қойдырып, ақ торғынға бөлеген» деп жазылған. Бұдан өзге Мұхтар Әуезовтың «Абай жолы» эпопеясында:
Қорқытпа менің баламды,
Гулей соққан ақ боран.
Балам әже қойнында, Келе алмайсың сен бұған, — деп басталатын бесік жырын кездестіруге болады. Мұның барлығы қазақ қоғамының қай кезде де баланы бесікке бөлегенін көрсетеді. Бұдан өзге де бесіктің түп-тамыры тереңде жатқанын дәлелдейтін аңыз-әфсаналар көп. Құрметті оқырмандар, бесіктің пайда болуы туралы аңыздарды қаншалықты білеміз? Ой бөлісе отырсаңыздар.

«Балаларға базарлық» 20.07.2017ж

Шығармашалық ұжым ұйытқы болған іс-шараның бірі Түлкібас ауданында болып өтті. Балалар мен жасөспірімдер арасында салауатты өмір салтын қалыптастыру және халқымыздың ұмыт бола бастаған ұлттық ойын түрлерін насихаттау мақсатында «Балаларға базарлық» тақырыбында ұлттық ойын түрлерінен Б. Саттарханов атындағы балалар спорттық-сауықтыру лагері оқушылары арасында сайыс ұйымдастырылды.

«Жүректі бір жаңарту» 14.07.2017ж

Әдет-ғұрып және салт-дәстүр орталығында Қазақстан Журналистер одағы мен С. Ерубаев атындағы жастар сыйлығының лауреаты, қоғам қайраткері, көрнекті ақын және жазушы Әкім Ысқақпен «Жүректі бір жаңарту» атты шығармашылық кездесу өтті. Елбасының «Болашаққа бағдар: рухани жаңғыру» мақаласы аясында өткізіліп отырған іс-шараның негізгі мақсаты: оңтүстіктің тумасы белгілі ақын және жазушы ағамызбен бас қосу, оқырмандармен қауыштыру, ақын шығармаларын көпшілікке насихаттау.

1 2 3