«Айтайық жарамазан елімізге!» 21.05.2018ж
Ақсу ауылы Қ. Жандарбеков атындағы Мәдениет үйінде Елбасының «Болашаққа бағдар: рухани жаңғыру» мақаласы аясында қасиетті Рамазан айы мерекесіне Әдет-ғұрып және салт-дәстүр орталығы мен Сайрам аудандық мәдениет және тілдерді дамыту бөлімі «Айтайық жарамазан елімізге!» атты рухани кеш өткізді. Ұлтымыздың мәдениеті, салт-санасы, ділі мен дінін айғақтайтын жарамазан жырының тәрбиелік мәнін жаңа қырынан танытуда кеш аудан тұрғындары, әсіресе оқушылардың танымын арттыруда рухани жаңа мазмұнда өтті. Мәдениет үйінің өнер ұжымы (режиссер Құлданов Әскер Төребайұлы, Мәдениет үйінің директоры С. Темірбаев) жарамазанның шығу тарихы, оның мән-мазмұнын сахналық қойылыммен бейнеледі.
«Теңге ілу», «Қыз қуу», «Жамбы ату» 16.05.2018ж
Елбасының «Болашаққа бағдар: рухани жаңғыру» мақаласы аясында ұлттық ойын түрлері — «Теңге ілу», «Қыз қуу», «Жамбы ату» ойындарын насихаттау мақсатында этнотанымдық іс-шара өткізілді. Этнотанымдық іс-шара барысында «Қыз қуу», «Жамбы ату», «Теңге ілу» нәтижелерінен бейнеролик түсіріліп, телеарна, өзге де БАҚ арқылы ел арасына таратылуда. «Қыз қуу» ойынына қатысушы жұптар асқан шеберліктерін көрсетсе, «Жамбы ату» ұлттық ат спорты ойынында жігіттер мергендік, ептілік қабілетімен танылды, «Теңге ілу» ойынында қатысушылар ептілік, әбжілдік көрсетіп, көрермендерді тәнті етті.
«Сүйек жаңғырту» 26.04.2018ж
Сарыағаш қалалық мәдениет және тілдерді дамыту бөлімімен бірлесе, халқымыздың көнерген «Сүйек жаңғырту» дәстүрін өңір тұрғындары арасында қайта жаңғырту мақсатында этнотанымдық іс-шара ұйымдастырды. Халық дәстүріне сәйкес «сүйек жаңғырту», «сүйек шатыс» деген сөздер жиі кездеседі. Бұл да үйлену, құдалық жолына байланысты шыққан ғұрып. Бұрын құдандалы болып бірі мен бірі сыйласқан екі жақ, екі ру бұрынғы іліктілікті қайта жалғастыратын болса, оны «сүйек жаңғырту» деп атаған.
«Үкілі ару» 24-25.04.2018ж
Облыс көлеміндегі аудандар арасында екі күндік «Үкілі ару» байқауын ұйымдастырды. Жүн түтіп, күбі пісіп, нан көміп, самауыр қойған ару қыздарымыз Ш.Қалдаяқов атындағы облыстық филармонияда өз өнерлерін көрсетіп, көрерменнің ықыласына бөленді. Қыздардың бірі көркемсөз оқудан жұртты тамсандырса, бірі мың бұрала би билеп, әуелете ән шырқады. Екі күнге созылған байқауда қазылар алқасы – ҚР еңбек сіңген қайраткері Әбдіраимова Сабираш Бимұрзақызы, «Оңтүстік Қазақстан» облыстық қоғамдық саяси газетінің руханият бөлімі меңгерушісі Үмітхан Алтаева, Шакура Қадірқұлова сынды ел аналары төрелік етті. Байқау қорытындысы бойынша: Бас жүлде – Зинулла Аружан Саулетбекқызына (Түлкібас ауданы), І орын – Аманбек Қарлығашқа (Ордабасы ауданы), ІІ орын – Әбубәкір Аружанға (Шымкент қаласы), ІІІ орын – Құдайбек Әйгерім Маратқызына (Түркістан қаласы) бұйырды.
«Жақсы келін-ырысың!» 27.03.2018ж
Отбасындағы ата-ене, келін, қайын сіңлі, қайын арасындағы сыйластық, ұлттық салт – дәстүріміздегі келіннің орны, отбасы ұйтқысына айналуы, «бесік жырын» насихаттауда «Жақсы келін-ырысың!» атты қалалық жас келіндер байқауы ұйымдастырылды. Байқауда бүтін бір әулеттің намысын қорғап, бір шаңырақты шаттыққа бөлеп отырған, он саусағынан өнері тамған, ата-баба дәстүрі мен салтын сақтауда өзгелерден ерекшеленген 7 келін бақ сынады. Сайыс мынадай 4 кезеңді қамтыды: 1.«Анамның әлдилеген ақ бесігі» бесік жырын орындау (5 минут) 2. «Салт-дәстүрім – рухани байлығым» Отбасылық салт-дәстүрімізге байланысты сұрақ-жауап (1 минут) 3. «Талантты болу — Тәңірден» өз өнерін көрсету (3-4минут) 4. «Халқын сүйген – салтын сүйер» үй тапсырмасы, қолөнер. Байқауға Б. Өтепов атындағы өнер мектеп-интернаты директоры, айтыскер ақын Маржан Есжанова, Қаратау ауданы әйелдер кеңесінің төрайымы Зульфия Бекмурзаева, Ш. Қалдаяқов атындағы облыстық филармония әншісі Гүлмира Қалыбекова төрелік етті. Нәтижеде 1-орын Айдана Егеубаеваға, 2-орын Айгерім Бегалыға, 3-орын Нұрәліқызы Айнисаға бұйырды. Өзге өнерпаздар түрлі номинациялармен марапатталды.
«Биік болсын шаңырақ!» 16.03.2018ж
Елбасының «Болашаққа бағдар: рухани жаңғыру» мақаласы аясында Әдет-ғұрып және салт-дәстүр орталығы Шымкент қалалық жастар бөлімімен бірлесе «Биік болсын шаңырақ!» тақырыбында қазақтың киіз үйін құрудан шеберлік сағатын өткізді. Шараның мақсаты: қазақ халқының дүниетанымында заттық, әрі рухани мәдениеттің үздік үлгісі саналатын киіз үйдің тарихын, құрылымын, шаңырақ, уық, кереге, т.б. жабдықтарының мән-мағынасын тарату, бүгінгі өмірдегі қолданысын жастарға насихаттау. Орталық директоры, мәдениет саласының үздігі Жәнібек Абданбекұлы шараның мән-мазмұны туралы айтып өтті. Әжелеріміз келген қонақтарға наурыз көжеден дәм таттырды. Шараға қаламыздағы жоғарғы оқу орны мен колледж студенттері қатысты.
«Наурыз айы туғанда…» 14.03.2018ж
Наурыз мерекесінің бастамасы «14 наурыз – Көрісу күніне» арналған «Наурыз айы туғанда…» мерекелік іс-шараны Түркістан аудандық тілдерді дамыту және мәдениет бөлімімен бірлесіп, киелі Түркістан қаласында атап өтті. Мәдениет үйінің кең ауласында бір-бірімен құшақ жая қауышқан жұрт наурыз көжеден дәм татып, игі тілектерін төкті. Әрі қарай мерекелік іс-шара той-думанға ұласты. Алғашқы құттықтау сөзді Түркістан қалалық соғыс және еңбек ардагерлер кеңесінің төрағасы Жарқынбек Құлбайымбетов, Түркістан қаласы әкімінің орынбасары Ғани Құрмашұлы Рысбеков бастады. Бұл кісілер бүгінгі шараның маңыздылығына тоқталды. Қазақстанның оңтүстік аймағына берік орныққан бұл дәстүр жыл сайын жергілікті халық сағына күтетін бірден-бір салт болып отыр. Кейінгі жастарға да үлгіге айналғанын атап өтті. Шаттық пен қуанышқа, ақ бата мен молшылыққа толы бұл мерекеде мәре-сәре болған жұрт осы қарқынмен Ұлыстың ұлы күні — Наурыз мерекесіне ұласатындығын атап өтті.
«Өмірге ынтық көңілмен…» 06.03.2018ж
Облысымыздағы мүмкіндігі шектеулі өнерпаз жандардан құрылған «Халқыма тағзым» қоғамдық бірлестігі мүшелерінің «Өмірге ынтық көңілмен…» атты шығармашылық концерті өтті. Шараның мақсаты: өнер жолында жүрген мүмкіндігі шектеулі жандарға қолдау көрсету, олардың шығармашылығымен өнер сүйер қауымды таныстыру; қоғамдық жұмыстармен айналысуларына мүмкіндік беру. Іс-шара барысында «Халқыма тағзым» қоғамдық бірлестігінің белді мүшесі, сазгер, ақын Нұржан Төребаев бастаған жас өнерпаздар: Зульфия Закирова, Зәкира Мейірбек, Ақерке Досқара, Айымтөре Есіркепова, Ақтөре Шалдар және Мақсат Қаналбеков әннен шашу шашып, көрерменге мерекелік көңіл–күй сыйлады.
«Дәстүрге берік отбасы» 26.02.2018ж
Отбасы құндылықтарын насихаттау барысында «Дәстүрге берік отбасы» атты ток-шоуы өтті. Зейнеткер-ұстаз Ырымкүл Ертаева, «Құрмет» орденінің иегері Сексенбай қажы Тұрысбеков, «Байғұт баба» мешітінің наиб имамы Нұрмахан қажы, орталықтың ғылыми қызметкері Райхан Алтыбаева және Сәбит пен Гүлжазира Мүсіреповтер отбасыларының кейіпкер ретінде қатысуымен өткен шара барысында отбасы құндылығы мен қыз бала тәрбиесі, атастыру, әмеңгерлік және сүйек жаңғырту дәстүрлері жөнінде көкейде жүрген мәселелер талқыланды. Сыр-сұқбат соңында сарапшылар: Ж. Шанин атындағы академиялық қазақ драма театрының әдебиет бөлімінің меңгерушісі, драматург Сая Қасымбек, Қаратау ауданы ардагерлер кеңесінің мүшесі Бекмырзақызы Зүльфия, Облыстық «Отырар» ғылыми-әмбебап кітапханасының ғылыми қызметкері, доцент Зылиха Жантасова бүгінгі көтерілген мәселелерге жан-жақты талдау жасап, өз бағаларын берді. Шараға мәдениет мекемелері қызметкерлері мен қаламыздағы ЖОО студенттері қатысты. Ток-шоу барысында «Сарқылмас қазына» тележобасы аясында түсірілген салт-дәстүрімізге қатысты бейнероликтер көрсетілді.